نظام IOS 14 – افضل 20 ميزة جديدة

قائمة ابرز 20 ميزة جديدة فى نظام ios 14 الجديد – القائمة دى تم اعدادها خصيصا ليك لو عايز تعرف اهم وابرز المميزات الجديدة اللى شركة ابل بتقدمهالك.

يوم الاثنين 25 يونيو – اعلنت ابل عن الاصدارات الجديدة لانظمة تشغيلها وبالاخص نظام IOS 14

تحتوى هذه القائمة على اهم 20 ميزة جديدة وهى كالاتى:-

  • تجربة استخدام جديدة
  • رسائل حديثة
  • خرائط متميزة
  • ترجمة محسنة عن الماضى
  • نظام سيري …

لو عايز تعرف اكتر عن الميزات اللى بيقدمهالك نظام IOS 14 – فأنت فى المكان الصحيح

مستعد؟ يلا بينا

شكل جديد كليا
وكانك فى البيت

فى الاصدار الجديد من نظام IOS 14 هتلاقى فى شكل جديد للحاجات المعتادة اللى انت عادة بتعملها بموبايلك.

مزايا جديدة هتساعدك فى الحصول على الحاجة اللى انت عايزها فى ثوانى, وخصوصا لو كان موبايلك iphone 11 pro max

التطبيقات اللى بتستخدمها طول الوقت, بقت ذكية اكتر, شخصية وأكثر امانا.

تجربة استخدام جديدة

كلنا عارفين ان نقطة التميز اللى بيقدمهالك الايفون عامة هى تجربة الاستخدام. تجربة استخدام موبايلات ايفون فريدة من نوعها ومع نظام IOS 14 بقت احسن واكثر ذكاء

1- ويدجيت على الشاشة الرئيسية widegets

تم اعادة تصميم الويدجيتس بطريقة جذابة وجميلة واكثر انتاجية, علشان تقدر توصل للمعلومة اللى بيقدمهالك اى تطبيق بسهولة وكمان هتبقى على مقدمة الشاشة الرئيسية فى موبايلك ال iphone

كمان هتقدر تحدد المساحات اللى بتشغلها الويدجيتس على الشاشة, وترتبها زى ما انت عايز.

الموبايل هيقدر كمان انه يضيف بذكاء الويدجيتس على شاشة موبايلك بناء على التوقيت اللى بتستخدم فيه التطبيقات بتاعتك اوتوماتيكيا

بديع جدا!

ويدجيتس
ويدجيتس
ويدجيتس

2- خاصية مكتبة التطبيقات app library

الميزة دى بتمكن الايفون انه اوتوماتيكيا ينظم التطبيقات بتاعتك فى فولدرات بسيطة سهل الوصول اليها, التطبيقات هنا بيتم تنظيمها بناء على التصنيف تبعها.

بكدا التطبيقات اللى بتستخدمها عادة وبشكل مكثف هتبقى على بعد ضغطة واحدة منك.

فولدرات ايفون

سهل وبسيط, يلا على اللى بعده.

3- مكالمات على الطاير

دلوقتى المكالمات من جهاز الايفون بتاعك, او من خاصية ال face time والتطبيقات التانية الشبيهة المختصة بالمكالمات هتظهر بشكل مختلف.

الشكل هنا هيبقى مضغوط, صغير ومش هيشغل كل مساحة الشاشة زى زمان, مجرد اشعار بالاتصال مع اسم وصورة المتصل.

مكالمات على الطاير

جميل جدا…

4- صورة جوا صورة

كتير لما كنا بنتصل بحد مثلا باستخدام خاصية ال Face Time او لو بنتفرج على فيديو, كان بيبقى الفيديو واخد كل حجم الشاشة.

دلوقتى الفيديو هياخد مساحة صغيرة جدا من الشاشة وهتقدر انك تكمل استخدامك لاى تطبيق عادى جدا وبالتالى دا هيوفر امكانية لمزيد من الاستخدام والانتاجية.

صورة جوا صورة

الرسائل

استخادم الرسائل فى الايفون من الحاجات الجميلة اللى بيقدمها الموبايل نظرا للايموجيز الجميلة اللى بيقدمها, بالاضافة للمميزات الجديدة اللى هنقولها دلوقتى

5- المحادثات المثبتة وتجميع الصور

دلوقتى تقدر انك تثبت اهم المحادثات لغاية 9 محادثات اعلى تطبيق الرسائل – وبالتالى تقدر توصل لهم بسهولة.

كمان هتقدر انك تجمع صور الاشخاص اللى بتكلمهم فى جروب محادثة علشان تعمل له هوية وشكل فريد بيه, تقدر تضيف صورة او ايموجى.

جروب صور
محادثات مثبته

6- امكانية عمل منشن

دلوقتى تقدر تعمل منشن لاى حد, فقط هتكتب اسمه وبكدا تقدر تبعت له الرسالة مباشرة, ولما يتعمل لك منشن, اسمك بيبقى بارز.

تقدر كمان انك تخصص جروب معين, علشان يتم ارسال نوتيفيكيشن ليك بس لو اتعمل لك منشن.

منشن

ممتاز…

6- ايموجى جديدة وستيكرات خارج الصندوق

مع تطور التكنولوحيا وخصائص التعرف على الوجه, دلوقتى هتقدر انك تخصص شكل الايموجى بتاعك, باكتر من 20 قصة شعر جديدة واستايلات مختلفة.

كل دا هيخليك تعرض صورتك ومنظرك وشخصيتك بشكل احسن زى مافى الصورة بالظبط.

ايموجى جديدة

دا بينقلنا على الخاصية السابعة فى فئة جديدة الا وهى الخرائط…

الخرائط

لطالما كانت الخرائط هى افضل وسيلة للتنقل ولمعرفة افضل الاماكن واوقات زيارتها وكمان استكشاف العالم من حواليك. مع خرائط IOS 14 هتقدر انك تستكشف اماكن جديدة بشكل ابسط, وبطرق افضل بكتير للوصول والملاحة والتنقل.

7- اتجاهات ركوب الدراجات

دلوقتى مع ios 14 تقدر لو بتحب انك تركب العجلة بتاعتك فى تراك معين او مشوار, لو فقط لمجرد سباق او رياضة – انك تعرف الاماكن الى بتحتوى على تراك لركوب العجلة.

افضل الشوارع اللى مفيهاش زحمة كتيرة, افضل الاماكن اللى فيها تقدر تركب عجليتك. مش بس كدا, هتقدر كمان تحدد الارتفاعات, الشوارع المزدحمة, السلالم.

كمان المنحدرات والاماكن المنخفضة والمتعرجة. دا لان تطبيق الخرائط دلوقتى بيحط المرتفعات والمنحدرات فى الاعتبار. وبيبعت لك نوتيفيكيشنز على حسب المكان.

يعنى هيتم تنبيهك بانك مقبل على منحدر مثلا, او بان قدامك سلالم ولازم تشيل العجلة بتاعتك. او احسن طريق تقدر تركب فيه عجليتك لتجنب الزحمة والسلالم وكدا.

اتجاهات ركوب الدراجات

رائع, لكن دا مش كل حاجة …

8- محطات شحن السيارات الكهربائية

الميزة دى ذكية جدا فعلا, دلوقتى تطبيق الخرائط بيقدر انه يحدد حالة شحن عربيتك الكهربائية ويحدد حاجات زى المرتفعات واوتوماتيكيا يقدر يضيف انت هتحتاج تشحن عربيتك امتى

التطبيق كمان بيقدر يعرف انهى محطة شحن متناسبة مع نوع عربيتك ويحط اوتوماتيكيا محطات الشحن على طول الطريق

9- ارشادات وادلة تطبيق الخرائط

تم التعاون مابين مطورى تطبيق الخرائط ومابين البراندات المعروفة لتقديم ادلة ارشادية للاماكن المعروفة حول العالم للاكل, التسوق والاستكشاف

تقدر دلوقتى تحفظ الادلة دى وهيتم حفظها تلقائيا لما يتم اضافة اماكن جديدة, وبالتالى هيبقى عندك اخر الترشيحات.

ادلة تطبيق الخرائط

ودلوقتى يلا بينا على الترجمة …

الترجمة

لابد للمحادثات مابين الالسن المختلفة انها تكون طبيعية وسهلة, ولايد كمان انها تتحلى بالخصوصية. علشان كدا ابل بتقدم لك تطبيق ترجمة جديد مخصص للمحادثات مابين 11 لغة مختلفة

10- نظام المحادثة المترجم

باستخدام تطبيق الترجمة, هتقدر انك تقوم بعمل محادثة كاملة مابين 11 لغة مختلفة, كل اللى عليك انك هتقلب موبايلك بالعرض والتضفط على زر الميكروفون

هتقول اى جملة انت حاببها وهيقوم نظام تعلم الالة والشبكة العصبية للتطبيق بادراك صوتك وتحليله – ترجمته الى اللغة اللى عايزها وكمان انتاج الصوت الخاص بالترجمة

كمان هتقدر انك تجمع التراجم المفضلة ليك فى تاب معين tab بحيث انك تقدر توصل للتراجم بشكل اسهل وابسط, حتى العبارات اللى قمت بترجمتها هيتم حفظها.

فيه ميزة جميلة فى تطبيق الترجمة وهى انك تقدر تعرض النص اللى تم ترجمته بالكامل علشان ياخد حجم الموبايل بالكامل وبالتالى يبقى اسهل للقراءة والعرض على موبايلك ال iphone

سيري

سيري من الخصائص المهمة فى نظام IOS 14 وبفضل الديزاين الجديد – تقدر تستفيد من كل حاجة بتقدمها سيري بدون ماتفقد الحاجة اللى بتدور عليها

11- ديزاين جديد لسيري

فى نظام IOS 14 تم عمل شكل جديد لسيري هيمكنك من انك تحصل بسرعة على المعلومة اللى بتدور عليها, او يتم عمل امر معين بدون ماتفقد التطبيق اللى انت شغال عليه

دلوقتى كمان سيري تقدر تعمل بحث وتدور على افضل الاجابات من الانترنت – فقط اسال سيري سؤال معين وهيتم البحث عن افضل الاجابات على النت

تقدر ترسل رسائل صوتية بصوتك لاى شخص باستخادم سيري بكل سهولة, سيري أصبحت اقوى بحوالى 20 مرة مما كانت عليه من 3 سنين مضت.

ديزاين جديد لسيري

حلو

بيتك

تطبيق المنزل او البيت هيساعدك على ادارة بيتك بشكل اكثر ذكاء, والاهم انه باكثر امانا, دلوقتى تقدر تختار من قائمة كبيرة من المميزات الخاصة بالتطبيق دا

12- انظمة اوتوميشن مقترحة Automations

لما بتضيف فى بيتك جهاز جديد ذكى زى اللمبات الذكية – تطبيق المنزل هيقترح عليك استخدام Automation معين

مثلا: لما اوصل البيت النور يشتغل, او لما افتح الباب النور يشتغل وهكذا.

اوتوميشن

12- حالة المنزل

الميزة دى فى تطبيق المنزل عبارة عن عرض لحالة منزلك او بيتك, التطبيق هنا بيعرض لك اهم الاضافات او الاجهزة اللى بتستخدمها عادة وبيرتب اولوية ظهورها ليك فى هاتفك ال iphone

  • مثال: عدد اللمبات المضاءة
  • اذا كان باب البيت مفتوح او مغلق
  • باب الجراج مفتوح ام مغلق
  • اذا فى اجهزة فى المطبخ شغالة
حالة المنزل

مش دى كل الحكاية

13- تغيير الاضاءة بذكاء Adaptive lighting

الميزة دى ذكية فعلا, اللمبات الذكية واللى تقدر تربطها بتطبيق المنزل دلوقتى بتدعم التغيير الذكى التلقائى لدرجة سطوع وحرارة اللمبة

هتقدر تتحكم فى حرارة اللمبة ولون اللمبة وسطوعها على مدار اليوم بشكل تلقائى وذكى, بالنهار هيكون لون الاضاءة ادفى ومع الوقت هيتحول للون الازرق النقى

فى الليل هيتم تقليل اللون الازرق علشان ميبقاش قوى على عينيك وبالتالى الوان صحية اكتر على العينين وذكية بشكل خرافى

14- منطقة النشاط والمراقبة

دلوقتى لو قدام بيتك كاميرا مراقبة او لو قدام محلك او اى مكان كاميرا مراقبة, تقدر تحدد بذكا منطقة المراقبة اللى لما يحصل فيها شىء معين

دا يبعت لك نوتيفيكيشن – بالتالى لو حصل تحرك مثلا او لو فى شخص هيخبط على الباب هيتم اشعارك بدا تلقائيا.

منطقة المراقبة

الخاصية دى رائعة

15- التعرف على الوجوه

دلوقتى كاميرات الابواب وحتى الجرس يقدر يتعرف على الوشوش اللى عملت لها tag فى تطبيق الصور.

بالتالى لما ييجى الشخص دا يزورك مثلا هيوصلك اشعار بوصوله وهتظهر لك صورته وتقدر كمان تكلمه من جرس الباب لو عايز – التقنية دى امنه تماما ومش بتتم فى سنتر ابل

او Apple cloud – لا! التقنية دى بتتم على موبايلك نفسه ولايتم تتبع اى شخص يزورك او اى شخص يظهر اما كاميرتك المثبته امام المنزل

التعرف على الوجوه

لكن افضل جزء هو …

سفاري

تصفح النت لازم يبقى سريع, امن وقوى. علشان كدا فى نظام IOS 14 ابل بتقدم لك متصفح سريع واكثر استجابة بالاضافة الى طرق لمساعدتك بمزيد من الامان

16- الترجمة ومتابعة الباسوردات فى سفاري

دلوقتى, سفاري بيقدم لك تراجم لسبع لغات مختلفة, يعنى وانت بتتصفح النت هتقدر تترجم الموقع كاملا الى سبع لغات مختلفة

وانت بتتصفح النت, ووصلت لموقع صفارى يقدر يترجمه, هتظهر لك ايقونة. فقط اضغط عليها واقرأ

وانت بتتصفح النت احيانا بيتطلب منك انك تكتب باسورد login علشان تدخل لحسابك, دلوقتى سفاري بيعمل مراقبة كاملة لكل الباسوردات اللى بتحطها فى اى موقع

ولو فى باسورد منهم تم اختراقه هيتم اشعارك لتغيير الباسورد, جميع باسورداتك محفوظة فى امان وحتى ابل متقدرش تعرف الباسوردات اللى كتبتها

الترجمة فى سفاري

السيارة

تطبيق carPlay غير تماما العلاقة مابين موبايلك والعربية بتاعتك. دلوقتى العلاقة دى بقيت اقوى, ابسط واكثر امانا مع امكانية فتح عربيتك الكهربائية وتشغيل الموتور فقط باستخدام موبايلك.

17- مفتاح عربيتك – افتح عربيتك بموبايلك

دلوقتى تقدر انك تفتح عربيتك الكهربائية بموبايلك, مش كدا وبس, تقدر كمان انك تشارك المفتاح دا مع اسرتك او مع اصدقائك بشكل مؤقت

تقدر كمان تحتفظ بالمفتاح الالكترونى دا فى محفظتك الالكترونية اللى بتقدمها ابل

تقدر كمان تختار التطبيقات اللى تظهر من خلال تطبيق carPlay مابين تطبيق الموسيقى, تطبيق محطات الشحن, وطلب الاكل وخلافه

فتح السيارة بموبايلك

كانه جزء من فيلم خيال علمى …

18- الايربودز AirPods

حاليا الايربودز بتقدم تجربة سماع خيالية. ومع نظام IOS 14 هتقدر انك تستمتع بتجربة سماع من نوع اخر, سواء بتسمع فيلم, موسيقى او محطة اذاعية.

دا لان الايربودز الجديدة بتقدم لك تجربة الصوت المكانية Spatial audio واللى بتقدم لك صوت محيط بيك من جميع الاتجاهات حتى لو حركت دماغك او الموبايل.

كمان هيظهر لك اشعار لو الايربودز محتاجة تتشحن

مع ميزة التحول الاوتوماتيكي, هتقدر انك تحول تلقائيا مابين الاجهزة. يعنى مثلا لو انت حاطط الايربودز فى ودانك وحد رن عليك, هيتم التحويل لموبايلك

وهتقدر ترد على الحد دا باستخدام الايبودز, انما بعد ماتخلص مكالمتك مثلا. وعايز تتفرج على فيلم على جهاز ال ipad بتاعك – اول ماتفتح ال ipad هيتم التحويل التلقائى عليه وتشوف الفيلم

دا مش كل حاجة

كمان الايربودز بقت بتدعم التعديل – يعنى لو عايز تظبط التون بتاع الصوت اللى بتسمعه على ودانك انت بس فاتقدر تعمل دا, لان كلنا عندنا اختلافات فى السمع

فهتقدر تعلى الاصوات الضعيفة, وتظبط الصوت على حسب سماعك انت, وكمان علشان تخلى صوت الموسيقى او المكالمات واضح ونقى

19 – خاصية App clips

الخاصية دى بتتيح لك انك تتعامل مع كل شىء حواليك على انه تطبيق بدل ماتنزل تطبيق جاهز من ال App store

الفكرة هنا انك مثلا لو عايز تطلب اكلة معينة, لو عايز تاجر عجلة او تدفع لركنة, كل دا بيتم بشكل مشابه لتجربة التطبيق.

خاصية app clips

ممتاز

20- الخصوصية والحماية

يعد الامان والخصوصية من اهم الحقوق ليك كمستخدم, وفى نظام IOS 14 شركة ابل بتقدم لك الى نظم الامان والحماية اللى ممكن تتخيلها

فمثلا المعلومات اللى بيتطلبها كل تطبيق على ال App Store تقدر تشوفها من قبل ماتنزل التطبيق.

لما يبقى فى تطبيق بيسجل لك, بيظهر لك ايقونة فى اعلى الموبايل بتوضح ان فى تطبيق بيسجل, وتقدر فى ال App center تعرف التطبيق اللى سجل.

الخصوصية والحماية

الموبايلات اللى هينزل فيها التحديث الجديد

  • iPhone 11
  • iPhone 11 Pro
  • iPhone 11 Pro Max
  • iPhone XS
  • iPhone XS Max
  • iPhone XR
  • iPhone X
  • iPhone 8
  • iPhone 8 Plus
  • iPhone 7
  • iPhone 7 Plus
  • iPhone 6s
  • iPhone 6s Plus
  • الجيل الاول من IPHONE SE
  • الجيل التانى من IPHONE SE

ودلوقتى جه دورك

فى نهاية مراجعتنا لاهم 20 ميزة فى نظام IOS 14 جه دورك دلوقتى
قول لنا فى الكومنتات ايه افضل ميزة عجبتك فيهم؟ هل حبيت الديزاين الجديد لسيري؟

ولا ياترى تجربة الاستخدام الجديدة عجبتك؟

احب اعرف انهى خاصية فى دول شدتك اكتر

4 Shares:
المقالات دى هتعجبك
ريلمي نارزو 10
كمل قراءة بقى

الاعلان عن ريلمي نارزو 10 وريلمي نارزو 10a – اهم الامكانيات المتوقعة

تعرف على ابرز امكاينات موبايل ريلمي نارزو 10a الجديد كليا من ريلمي والمتوقع ان يتم الاعلان عنه يوم 26 مارس الجارى, تعرف على ابرز الامكانيات المعلنة حتى الان والتى ستأتى فى هذا الهاتف الجديد.