5 مميزات أساسية لاختيار شاشة الموبايل

كيفية اختيار شاشة الموبايل فى 2020, كيف تختار موبايل بشاشة تلبى احتياجاتك – المرجع الكامل لاختيار الشاشة

كيف تختار شاشة موبايلك

المرجع الشامل لاختيار شاشة الموبايل, هتتعلم كيفية اختيار موبايلك بناء على شاشة الموبايل.

بيحتوى المرجع على اهم خمس عوامل للحكم على شاشة الموبايل وهى كالاتى:-


انواع الشاشات والفروق بينها
حجم الشاشة
دقة الشاشة
سطوع الشاشة
التقنيات الجديدة

لو عايز تحصل على أفضل شاشة موبايل ممكنة – فأنت فى المكان الصحيح

مستعد؟ يلا بينا

الحلقة الأولى فى سلسلة كيف تختار موبايل مناسب

من خمس سنوات وتحديدا في 2015 كان كل اللى بيهمنا فى الموبايل أنه تكون الكاميرا كويسة والموبايل مش بيهنج وراماته عالية ويكون سعره مناسب.

لكن فى 2020 ومع تعدد شركات الموبايلات وتعدد الإمكانيات والمميزات والعيوب أصبح اختيار الموبايل حاجة شخصية جدا لان اللى هينفع مع صاحبك مش هينفع معاك والعكس صحيح.

الموضوع بقى انتقائى Custom جدا لكن فى مميزات أساسية لازم كلنا نبقى متفقين عليها وعلشان كدا عملنا سلسلة المقالات دى تبقى مرجع لأى حد عايز يحدث معلوماته ويزود معرفته فى عالم الموبايلات اللى بيتغير بوتيرة سريعة جدا.

فى المقالات الطويلة شبه السلسلة دى، هنكتب باللغة اللى يفهمها كل الناس وكأننا قاعدين على كافيه وهنجيب أعقد المصطلحات والمفاهيم ونقدمها بصورة مبسطة جدا.

علشان الكل يقدر يفهم ويستفيد ويعرف ازاى يشترى موبايل كويس تبعا لاحتياجاته واستخدامه والفئة اللى عايز يشترى فيها.

الحلقة دى هنتكلم عن اختيار شاشة الموبايل، الحاجة اللى هتفضل باصص لها طول ما الموبايل فى ايدك والنضارة اللى من خلالها هتقدر تكتشف أبعاد إمكانيات موبايلك وتجربته معاك.

اولا : انواع الشاشات والفروق بينها

انواع الشاشات والفرق بينها
انواع الشاشات

بداية كدا لازم تبقى عارف ان الشاشة عامل أساسى من العوامل الخمسة اللى بتحدد شرائك للموبايل، وأفضل شركة على الاطلاق فى تصنيع شاشات الموبايلات والطفرات اللى بنشوفها فى شاشة اى موبايل بتبقى أساسها شركة سامسونج.

سامسونج بتصنع الشاشات وبتبيعها لبقية الشركات التانية وعلى رأسها ابل طبعاً، ودا لأنها الافضل زى ماهنعرف دلوقتى ليه.

انواع شاشات الموبايلات
الانواع المختلفة للشاشات

بداية انواع شاشات الموبايلات الموجودة حالياً نوعين.

  • شاشة LCD
  • شاشة Amoled

1 : الشاشة ال LCD

فكرة الشاشة LCD ببساطة اننا بنمرر الضوء من مصدر أساسى فلورى كبير على مرشحات الوان كل بيكسل هنا مكون من 3 بيكسلات اصغر : RGB احمر واخضر وازرق, ولما ندمج الالوان الثلاثة مع بعضها البعض هينتج لنا فى النهاية مدى كبير يصل الى 16 مليون لون.

2 : الشاشة ال AMOLED

التقنية هنا مختلفة بقى, مصدر الضوء بيبقى فى شكل ثنائيات باعثة للضوء Diodes ودا بيدى سمك أقل فى الشاشة وتوفير فى استخدام الطاقة بالاضافة الى سطوع أعلى higher nits وكمان معدل تحديث عالى refresh rate لتجربة العاب وتنقلات افضل بين التطبيقات.

طبعاً الشاشة ال Amoled بتبقى أفضل بكتير لأنها بتوفر فى الطاقة بمعنى أن كل بيكسل بيبقى وحدة مستقلة بذاتها وبناء عليه على حسب مناطق الإضاءة والحاجة المعروضة على الشاشة بتتعامل بذكاء معاها.

فلو الصورة فيها لون اسود البيكسلات هتنطفى تماماً ولو اى لون تانى هيتم عرضه عادى جدا.

الفرق بين LCD و Amoled
الفرق بين الشاشات ال LCD وال AMOLED

دا هينقلنا لرابط تانى الا وهو التباين. التباين بالانجلش = contrast

التباين هنا معناه الفرق بين درجات الالوان وبنستخدمه اكتر مع اللونين الأبيض والاسود.

اذا كانت قدرة الشاشة عند عرض صورة تحتوى فقط على اللونين الأبيض والاسود كبيرة بمعنى ان اللون الابيض ساطع وحاد ومش مفرقع كدا وان اللون الاسود اسود قاتم مش مدى على رمادى كدا وزوايا الرؤية فيه مستقرة وثابته فدا معناه ان الـ contrast بتاع الشاشة دى كويس.

شاشات ال Amoled بتوفر اعلى نسبة contrast واللى بنكتب جنبها ان ال contrast لانهائى فى مراجعاتنا لشاشات الموبايلات لان البيكسلات فى الاسود بتنطفى اساسا وفى الابيض بتبقى ساطعة وبالتالى الفرق هنا لانهائى.

خلاصة دا ان جودة الشاشة فى عرض الالوان وخصوصا الابيض والاسود بتبقى ممتازة – ومن هنا جت فكرة always on Display … احنا بنقول للموبايل مش الشاشة بتاعتك AMOLED؟

طيب احنا هنطفى كل البيكسلات بتاعتك وعايزين بس جزء صغير جدا منها هوا اللى شغال علشان يعرض لنا الساعة والتاريخ مثلا وبالتالى مش هتلاقيها فى شاشات LCD

علشان كدا هنستنفذ طاقة البطارية لان مصدر الضوء الاساسى اللى منور الشاشة كلها شغال مش بس بعض البكسلات كما فى حالة الاموليد Amoled.

علشان اختيار شاشة الموبايل بيشكل احد الأعمدة الرئيسية عند شراء الموبايل لازم تبقى عارف ومتأكد ان الشاشة ال Amoled بتوفر فى الطاقة بشكل كبير جداً.

فالشركات استغلت النقطة دى وعملت خاصية جديدة اسمها Always on Display بمعنى أن موبايلك طول ماهو مطفى هيعرض لك على ال panel بتاع الموبايل الساعة والتاريخ وحالة الطقس مثلا.

ولو اى نوتيفيكيشن وصلت ممكن يعمل أنيميشن معين زى تحديث MIUI 11 اللى لعب على النقطة دى جداً واستغل قدرات الشاشة ال Amoled وبقى يعرض أشكال سيمترية ملونة وجميلة على الشاشة فى حالة Always on Display

ممتاز جدا – يلا بينا ننتقل لحجم الشاشة …

ثانيا: حجم الشاشة

حجم الشاشة
الاحجام المختلفة

مع تطور امكانيات الموبايلات وتعدد استخدامنا ليها اصبحنا فى حاجة لشاشات بحجم أكبر، علشان تجربة مشاهدة يوتيوب مثلا، أو تجربة اللعب Gaming أو فتح تطبيقين فى نفس الوقت.

ودا خلى الشركات تصنع شاشات اكبر ولو عملنا احصائية هتلاقى أن معظم موبايلات 2019 الشاشة فيها ٦ انش أو اكبر وخصوصا أن معظم الشركات بقت بتنافس بعضها على مين يقدر يوفر فى حجم الحافة السفلية فى فئة معينة,أصبحت من نقاط القوة فى اى موبايل.

بالتالى يفضل جدا انك وانت بتختار الموبايل تشوف الحجم قد ايه وتعرف أن الشاشة الأكبر افضل.

اللى بعده …

ثالثاً: دقة الشاشة

دقة الشاشة
دقة الشاشة

لازم وانت بتختار موبايلك تركز أوى فى النقطة دى، لأنها نقطة جوهرية فى تجربة استخدامك جدا وهتفرق فى اختيارك مابين موبايلين فى نفس الفئة، دقة الشاشة.

لو لقيت مكتوب فى جدول الإمكانيات اللى بنحطه فى مراجعة اى موبايل جنب خانة دقة الشاشة كلمة HD فدى معناها High Definition وهنا الشاشة بتبقى بدقة : 720P

بمعنى ان الخط الافقى لشاشة الموبايل من اولها لاخرها بيحتوى على 720 خط بكسلات عمودى نازل لاخر الشاشة.

لكن لو لقيت مكتوب كلمة FHD فدى معناها Full High Definition وهنا الشاشة بتبقى بدقة : 1080P بمعنى ان الخط الافقى لشاشة الموبايل من اولها لاخرها بيحتوى على 1080 خط بكسلات عمودى نازل لاخر الشاشة.

وطبعا كل مالرقم دا زاد كل ما عدد البكسلات فى كل انش زاد وكل ما دقة الشاشة زادت.

كل الف بكسل بنطلق عليهم لقب K بمعنى ان الشاشة الى دقتها 1440*2560 بنسميها 2k الفكرة هنا مش فى طول الشاشة – الفكرة فى عرض الشاشة ومن هنا بينشأ مصطلح ال aspect ration زى معظم فيديوهات اليوتيوب اللى بقيت 16:9 يعنى نسبة العرض الى الطول = 16:9

كثافة البكسلات فى كل انش بردو بتبقى متعلقة بدقة الشاشة بمعنى أن لو موبايلك بشاشة HD هتكون كثافة بكسلاته لكل انش أقل وبالتالى جودة العرض أقل وجودة فتح فيديوهات اليوتيوب معاك اخرها هيبقى 720P .

بعد 450 بكسل لكل انش خلاص العين مبتقدرش تفرق وبتبقى الصورة عالية الجودة وحادة جداً sharp.

رائع … ننتقل لسطوع الشاشة بقى.

رابعا : سطوع الشاشة

سطوع الشاشة
سطوع الشاشة ووحدة قياسه

سطوع الشاشة بنقيسه بوحدة قياس اسمها nit وكل ما الرقم كان عالى كل ما السطوع بتاع الشاشة كان أفضل وأعلى.

هنلاحظ فى الموبايلات الفلاج شيب زى iphone 11 pro max أنها بتتميز بسطوع عالى يصل إلى 800 nits وبالتالى هتقدر تستخدم موبايلك حتى فى أشعة الشمس المباشرة أو الإضاءة العالية.

سطوع الشاشة فى الشاشات ال AMOLED بيبقى أعلى والحواف بتاعت الشاشة بتبقى حادة جدا ومفيهاش اى Distortion او حواف مشوهة زى لو دققت اوى فى الشاشة ال LCD

لو عايز تختبر الموضوع دا خليك بالليل او فى مكان مظلم وعلى اضاءة الموبايل على الاخر على خلفية بيضاء وشوف الحواف بتاعت الشاشة, هتلاحظ ان الحافة فيها شوية Distortion كدا او خط ازرق صغير لامع.

وأخيرا … التقنيات الجديدة

خامساً : التقنيات الجديدة

التقنيات الجديدة
التقنيات الجديدة

دا كدا بالنسبة للقواعد الأساسية اللى لازم اى حد يبقى عارفها وهو بيختار موبايله الجديد. لو هتشترى موبايل فلاج شيب بقى لازم الشركات تدلعك شوية.

يعنى بدل معدل التحديث القليل 60 هيرتز هيبقى اعلى, الشاشة ال Amoled هتبقى Super Amoled … ايه؟ يعنى ايه بقى Super Amoled دى كمان ياصاحبى؟

دى ياصاحبى نفس فكرة ال Amoled بالظبط ولكن سامسونج حبت انها تعمل لنفسها براند brand name علشان معروف انها افضل مصنع للشاشات وكدا فحبت انها تختلف عن باقى الشركات اللى بتبيع لها منتجها بانها تديله اسم مختلف لكن التقنية هى هى والفرق فى السطوع دا اساسا بيعتمد على قوة ال diodes اللى مكونة للشاشة عادى.

لو لاحظت هتلاقى أن شركة ابل بتحب دائما تبقى مميزة فى كل نقطة من نقاط الإمكانيات فى موبايلاتها بتيجى تسمى الشاشة بتاعتها Retina Oled ودا مسمى فقط لاغير. التقنية هى هى متغيرتش.

خد بالك ان الاصدار الجديد من موبايل realme 7 pro هتلاقى أن الشاشة بتيجى بمعدل تحديث Refresh Rate أعلى من بقية الموبايلات التانية بمعدل 90 هيرتز

معدل التحديث هنا هو معدل عمل Refresh للشاشة فى الثانية الواحدة وطبعا كل ما الرقم دا زاد كل ما بقت السحبات Swipes وال… Gestures سلسة وسريعة.

دا برا قصة المعالج خالص، دا مجرد عرض للحاجة إلى انت عايزها سواء انيميشن فتح وغلق تطبيق أو تجربة العاب Gaming أو عمل swipe and scroll كل دا هيبقى سلس جدا وانسيابى.

طبعاً الرقم دا بيبقى كبير خصوصا فى التابليت وال iPad لكن مع التطور الحاصل فى الشاشات بقى فى تطوير فى معدل التحديث Refresh rate ممكن يوصل ل 120 هيرتز زى مانزل فى موبايل Samsung galaxy S20.

فى 2018 ابل فاجأتنا بموبايل من غير حواف تقريبا ماعدا الحافة العليا كان فيها نوتش صغير نسبيا وقتها بيحمل الكاميرا الأمامية وباقى سينسورات الموبايل.

تطورت تصميمات الشاشات وبقى عندنا Infinity- U notch و Water-Drop notch و hole punch Display … هوب هوب براحة علينا كدا! ايه دا؟

الاشكال المختلفة للنوتش
الاشكال المختلفة للنوتش

اول مصطلحين دول بيوصوفوا شكل الحتة السودا اللى فى الحافة العلوية واللى بتحتوى على الكاميرا الأمامية.

كان التحدى قدام الشركات أنها تعمل شاشات بحواف علوية صغيرة جدا ومع ذلك تحافظ على الكاميرا الأمامية بشكل جميل.

فى شركات قالت نحطها فى منتصف الشاشة من فوق وبالتالى أصبحت الشاشة بتحتوى على نوتش على شكل قطرة مياه water drop ودا اكتر شكل انسيابى ومقبول جدا وبيخلى الديزاين روش كدا وعصرى.

وفى شركات قالت إنها هتشيل الكاميرا تماما من الشاشة وهتخليها فى موتور منفصل يطلع وقت التصوير وينزل تانى مكانه ومن هنا نشأ مصطلح PopUp Camera لان الموتور بيخرج من جسم الموبايل وينزل تانى.

وهنا خرج للنور الشاشة الكاملة أو ال Full Display واللى بتقدم لك أفضل تجربة مشاهدة و العاب Gaming لانك بتحس انك ماسك شاشة فى ايدك مفيش حواف bezels إطلاقاً ومفيش نوتش ودى افضل تجربة مشاهدة موجودة حاليا وكان موبايل Oppo Find X هو الموبايل الأبرز فى النقطة دى.

-فى حاليا محاولات ان الكاميرا الامامية تبقى تحت البانل بتاع الموبايل لكن لازالت التقنية دى فى اولها وتحت الاختبار

فى سنة 2017 بردو سامسونج قدمت ديزاين روش جدا فى شاشاتها وهو مصطلح ال edge واللى خلى الشاشات ليها منحنيات كدا curves وكأنها مكبوبة على الأطراف.

لكن دا بردو زى مابيخلى الديزاين روش وعصرى بيخلى مسكة الموبيل يبقى فيها لمسات غلط كتير والشاشة متبقاش مستجيبة responsive بشكل أفضل، علشان كدا شركات كتير فضلت التصميم المسطح Flat عن المنحنى.

ملخص نهائى لمميزات الشاشة

  • نوع الشاشة مابين LCD, Amoled
  • حجم الشاشة ودا بنقيسه بالانش Inches.
  • دقة الشاشة مابين HD, FHD Plus, 2K
  • كثافة البكسلات لكل انش PPI
  • شكل الشاشة والنوتش.
  • سطوع الشاشة، معدل التحديث والانحناءات.

وبكدا نكون غطينا الأساسيات اللى المفروض تبقى حاططها فى دماغك وانت بتختار شاشة موبايلك، وتبقى عارف ان اللى الموبايل الفلاج شيب بيقدمهولك بيبقى نتيجى بحث وشغل ودراسة ومتأكد انك متميز بشكل كبير عن غيرك وطبعاً كل دا بيصب فى تجربة الاستخدام النهائية User Experience.

متنساش تقول لنا ايه الشىء اللى بتميزه عند اختيار موبايلك بناء على عنصر الشاشة وتعمل لنا كومنت برأيك فى المقالة – يومك سعيد

0 Shares:
المقالات دى هتعجبك
ريلمي نارزو 10
كمل قراءة بقى

الاعلان عن ريلمي نارزو 10 وريلمي نارزو 10a – اهم الامكانيات المتوقعة

تعرف على ابرز امكاينات موبايل ريلمي نارزو 10a الجديد كليا من ريلمي والمتوقع ان يتم الاعلان عنه يوم 26 مارس الجارى, تعرف على ابرز الامكانيات المعلنة حتى الان والتى ستأتى فى هذا الهاتف الجديد.